Geir, Jafet og kona

Á fréttavef Ríkisútvarpsins var greint frá því að kona hefði boðið sig fram til formennsku Knattspyrnusambands Íslands.  Áður hafði komið fram að Geir Þorsteinsson framkvæmdastjóri KSÍ og Jafet Ólafsson fyrrv. forstjóri VBS hefðu tilkynnt um framboð til formennsku. 

Það er dæmigert að fréttin skuli snúast um það að kona bjóði sig fram, ekki að Halla Gunnarsdóttir hafi ákveðið að skella sér í formannsslaginn.  Kannski er þetta óafvitandi hjá mbl.is en kannski er þetta bara dæmigert fyrir viðhorfin í samfélaginu.  Út af fyrir sig er það fréttaefni að nú gefst knattspyrnuhreyfingunni í fyrsta skipti tækifæri til að kjósa konu í formannsstól en að sjálfsögðu er það aðalatriðið að það er Halla Gunnarsdóttir, blaða- og knattspyrnukona sem sækist eftir formennsku í KSÍ. Vonandi ber knattspyrnuhreyfingin gæfu til að gera hana að formanni.

Athugasemdir

[Hlynur Þór Magnússon, 20.1.2007 kl. 09:44]

Ekki er ég nú alveg sammála þér þarna. Mér finnst fréttin einmitt vera sú, að kona skuli bjóða sig fram í því karlavígi sem KSÍ er - en ekki sérstaklega að það sé einhver Halla Gunnarsdóttir, sem ég held að fæstir áhugamenn um knattspyrnu þekki, þar á meðal ég.

[Árni Þór Sigurðsson, 20.1.2007 kl. 10:21]

Sæll Hlynur.

Auðvitað er það frétt að kona bjóði sig fram, en konan heitir Halla Gunnarsdóttir og er einstaklingur, manneskja.  Mér finnst nálgunin vera dálítið karlaleg!

[Sigurður Elvar Þórólfsson, 20.1.2007 kl. 14:07]

Ég veit ekki í hvaða frétt á mbl.is þú ert að vitna í Árni -  Ég skrifaði þessa frétt og það eitt að Halla heitir Halla er kannski nóg að fréttin skuli snúast um það að kona bjóði sig fram? 

Halla Gunnarsdóttir, blaðamaður á Morgunblaðinu, hefur ákveðið að bjóða sig fram til formanns Knattspyrnusambands Íslands á ársþingi KSÍ sem fram fer 10. febrúar. Þrír aðilar hafa tilkynnt um framboð til formanns KSÍ en auk Höllu eru Geir Þorsteinsson og Jafet Ólafsson í framboði.

Halla hefur þjálfað yngri flokka og leikið sjálf með félagsliðum hér á landi en á fundi með fréttamönnum í morgun sagði Halla m.a. að knattspyrnan ætti að vera fyrir alla.

Ég hefði frekar átt að segja að "Beyglan bjóði sig fram í formanninn"  - en Halla er þekkt sem knattspyrnusnillingurinn "Beyglan" hjá sparksérfræðingum Morgunblaðsins. En vissulega er hún kona en það kom ekki fram í þessari frétt sem hér fylgir með.  

 

 

[Sigurður Elvar Þórólfsson, 20.1.2007 kl. 14:10]

Hér er líka greinin sem birtist í Morgunblaðinu um framboð Höllu - ekki minnst á kyn hennar í fréttinni.  Aðeins nafnið hennar. Sem leiðir af því líkum að hún sé kona. Ég er því ekki að "fatta" þetta innslag hjá þér Árni. 

http://mbl.is/mm/gagnasafn/grein.html?grein_id=1125066

[Árni Þór Sigurðsson, 20.1.2007 kl. 14:21]

Sæll Sigurður.

Ætla alls ekki að hafa þig fyrir rangri sök, en þegar fréttin birtist á mbl.is var fyrirsögnin "Kona býður sig fram..".  Vel getur verið að það hafi bara verið fyrsta frétt um málið og síðan hafi því verið breytt.  Þetta vakti bara athygli mína á því að konan væri ekki meðhöndluð sem maður.  Í þessu innslagi er engin dýpri merking af minni hálfu.

[Sigurður Elvar Þórólfsson, 20.1.2007 kl. 14:23]

Ekkert mál - líklega ertu að vitna í frétt  RÚV...

http://ruv.is/heim/frettir/frett/store64/item141167/ 

[Eiður Svanberg Guðnason, 21.1.2007 kl. 10:10]

"Vonandi ber knattspyrnuhreyfingunni gæfa til að gera hana að formanni."  !!!

Hvernig  væri að stjórnmálamaðurinn ÁÞS vandaði sig í meðferð móðurmálsins ?