Ingibjörg getur enn orðið forsætisráðherra

Nú þegar ríkisstjórn Sjálfstæðisflokks og Framsóknarflokks er sprungin á limminu kemur upp nú staða. Það eru allar forsendur til að mynda velferðar- og félagshyggjustjórn Samfylkingar, Vinstri grænna og Framsóknarflokks. Vinstri græn og Framsóknarflokkur eru sammála um að leggja til við forseta Íslands að Ingibjörg Sólrún Gísladóttir fái umboð til stjórnarmyndunar og myndi stjórn þessara þriggja flokka.

Reynt hefur verið að halda því fram að tortryggni milli VG og Framsóknar kæmi í veg fyrir samstarf þeirra í ríkisstjórn. Þetta er vitaskuld alrangt. Vinstri græn hafa ALDREI hafnað þeim kosti, enda þótt málefnaágreiningur hafi verið milli flokkanna á liðnum árum, rétt eins og milli Framsóknar og Samfylkingar. En við stjórnarmyndun horfa menn til framtíðar og slá striki yfir hið liðna - nema hvað?

Nú er einungis spurning hvort Ingibjörg Sólrún Gísladóttir veldur félögum sínum á trúnó.is vonbrigðum og bendir á karlinn Geir Hilmar Haarde til að mynda næstu ríkisstjórn. Hver mun nú klúðra hinu sögulega tækifæri? Jafnaðar- og félagshyggjufólk í flokkunum þremur hlýtur að hvetja til þess að mynduð verði öflug velferðar- og félagshyggjustjórn fremur en ríkisstjórn sem mun eiga allt sitt undir fjármálaöflunum í landinu, eins konar baugsstjórn. Það er augljóst að Samfylkingin á næsta leik - við hvern liggja skyldur hennar og trúnaður?

Formlegar stjórnarmyndunarviðræður hefjast væntanlega á morgun

Glæsilegur sigur - kærar þakkir

Úrslit þingkosninganna eru glæsilegur sigur Vinstrihreyfingarinnar - græns framboðs.  Flokkurinn nær tvöfaldaði þingmannatölu sína sem er afar sjaldgæft í íslenskri pólitík, svo ekki sé meira sagt. 

VG er því ótvíræður sigurvegari þessara kosninga.  Sjálfstæðisflokkurinn bætir líka við sig og styrkir stöðu sína.  Frjálslyndir halda sínum hlut þrátt fyrir klofninginn í vetur en aðrir flokkar tapa fylgi.  Einkum geldur Framsóknarflokkurinn afhroð.

Persónulega er það mér ánægjuefni að vera kjörinn á Alþingi.  Ég vil nota þetta tækifæri og þakka öllum sem lögðu VG lið í kosningabaráttunni og með atkvæði sínu á kjördag fyrir stuðninginn.  Við munum öll leggja okkur fram um að standa undir því trausti og þeim væntingum sem til okkar eru gerðar.

Spennan eykst

Þá er kjördagur að kvöldi kominn, aðeins hálfönnur klukkustund þar til fyrstu tölur birtast.  Spennan magnast.

Dagurinn í dag hefur verið viðburðaríkur, ég hef farið milli kosningamiðstöðva okkar Vinstri grænna hér á höfuðborgarsvæðinu, gengið um bæinn og heimsótt kosningamiðstöðvar Samfylkingar og Frjálslyndra.  Þannig að ég hef í dag hitt fjöldann allan af fólki og það er einmitt það sem er hvað skemmtilegast á kjördegi.

Stemningin hjá okkur Vinstri grænum er gríðargóð, við erum sannfærð um að ná góðum árangri í þessum kosningum og jafnvel tvöfalda fylgi okkar frá því síðast.  Það væri þá um stórsigur að ræða í pólitísku sögulegu samhengi.  Mikilvægast er að sjálfsögðu að ríkisstjórnin missi meirihluta sinn svo núverandi stjórnarandstaða geti tekið við stjórnartaumunum og innleitt jöfnuð, réttlæti og virðingu fyrir umhverfi og náttúru inn í landsstjórnina.

Við sjáum hvað setur.

Lokasóknin er hafin - byr í seglum VG

Þessi könnun bendir til þess að mjög mjótt sé á munum milli stjórnar og stjórnarandstöðu.  Það er raunhæfur möguleiki að fella ríkisstjórnina og mynda nýja stjórn núverandi stjórnarandstöðuflokka.

Öll viðbrögð stuðningsmanna Sjálfstæðisflokksins ganga út á hræðsluáróður þessa síðustu daga.  Þeir telja að ekki sé hægt að mynda hér trausta ríkisstjórn nema undir þeirra eigin forystu.  Þetta er að sjálfsögðu bábylja.  Stjórn sem leggur megináherslu á velferðarmál, umhverfismál, jafnrétti og jöfnuð þarf að taka við af þeirri sem nú situr.  Það verður best tryggt með öflugum stuðningi við Vinstri græn.  Lokasóknin er hafin og það er byr í seglum Vinstri grænna.

Samfylking og VG bæta við sig

Stjórnin í bullandi vörn - lokasóknin er hafin

Stöð 2 var með ágætan þátt í kvöld þar sem formenn stjórnmálaflokkanna tókust á um meginmál kosninganna á laugardag. Þátturinn var nýstárlegur, bæði sátu formennirnir öll saman en síðan var hvert og eitt þeirra yfirheyrt sérstaklega. Í lokin voru síðan þrír álitsgjafar sem sögðu kost og löst á frammistöðu formannanna.

Þátturinn hófst með því að kynnt var ný og stór skoðanakönnun sem Félagsvísindastofnun gerði fyrir Stöð 2. Þar fær Sjálfstæðisflokkurinn um 38% og Framsókn 8,6% og samanlagt fá stjórnarflokkarnir 30 þingmenn. Samfylkingin hefur náð vopnum sínum og mælist með tæp 30%, sem er að nálgast kjörfylgið í síðustu kosningum, Vinstri græn eru rúm 16% en það er tvöföldun á fylgi frá 2003 og Frjálslyndir eru með rúm 5%. Samanlagt fá stjórnarandstöðuflokkarnir 33 þingmenn. Íslandshreyfingin nær ekki að koma manni að og vantar talsvert á að svo verði.

Í þættinum voru formenn stjórnarflokkanna í bullandi vörn, einkum Jón Sigurðsson. Að mínum dómi stóðu Steingrímur J. Sigfússon og Ingibjörg Sólrún Gísladóttir sig áberandi best, þannig að ég er sammála álitsgjöfum Stöðvar 2 um það atriði. Sömuleiðis um að formaður Framsóknar hafi átt lakastan leik. Hins vegar vekur athygli mína sú skoðun álitsgjafanna að Sjálfstæðisflokkur og Samfylking hafi verið að daðra hvort við annað. Það vekur upp spurningar um það hvort atkvæði greitt Samfylkingu sé hugsanlega ávísun á áframhaldandi stjórnarforystu Sjálfstæðisflokks.

Nú eru aðeins 2 dagar til kjördags. Þótt enn séu talsverðar sveifur í skoðanakönnunum þá eru stóru línurnar samt skýrar. Samfylkingin verður á svipuðu róli og síðast og hið sama má segja um Frjálslynda. Framsókn tapar og Sjálfstæðisflokkur bætir við sig. Vinstrihreyfiingin - grænt framboð stefnir síðan í að tvöfalda fylgi sitt frá síðustu kosningum, og verði það úrslitin á laugardag, þá er það sögulegur pólitískur sigur og skýr skilaboð frá kjósendum um að VG eigi að axla ábyrgð í landsstjórninni. Til þess erum við að sjálfsögðu reiðubúin. Nú verða allir að leggjast á eitt og tryggja VG sögulegan sigur, það er eina raunverulega tryggingin fyrir breytingar. Lokasóknin er hafin, það er hægt að fella ríkisstjórnina og koma sjónarmiðum velferðar, umhverfisverndar, jafnréttis og jöfnuðar að í ríkisstjórn. Látum þann draum rætast.

Ögmundur spurður um "bankana úr landi" hjá Kaupþingi

Framsóknarflokkurinn auglýsir að Vinstrihreyfingin grænt framboð vilji senda bankana úr landi. Þar er vísað í gagnrýni Ögmundar Jónassonar þingflokksformanns VG nýlega  í garð bankaforstjóra sem honum þótti skammta sér um og ganga fram af samfélaginu með ýmsum hætti. Ögmundur mun hafa sagt á þá leið að hann vildi ekki fórna íslensku jafnaðarsamfélagi fyrir "þotuliðið í bönkunum".

 

Þetta hefur síðan verið túlkað á þann veg að Ögmundur Jónasson eigi sér þann draum æðstan að koma öllum íslenskum bönkum úr landi!

Ég hafði í bland gaman og fróðleik af því að sitja frambjóðendafund í Kaupþingi ásamt Ögmundi þar sem þessi mál bar á góma. Ögmundur var að vonum spurður út í staðhæfingar Framsóknar. Hann minnti á að hann væri stjórnarformaður stærsta lífeyrissjóðs landsins, Lífeyrissjóði starfsmanna ríkisins, LSR, sem hefði fjárfest í íslenskum fjármálafyrirtækjum fyrir milljarðatugi. Eignarhluti sjóðsins í íslensku bönkunum væri á milli 35 og 40 milljarðar króna. Auk þess ætti sjóðurinn skuldabréf hjá bönkunum að verðmæti 15 – 20 milljarða. Þessi tiltekni lífeyrissjóður hefði fjárfrest hjá íslenskum útrásrafyrirtækjum fyrir milljarða á milljarða ofan. "Allt er þetta gert með mínum velvilja og mínu atkvæði", sagði Ögmundur.

 

"Halda menn virkilega að ég vilji ekki þessum stofnunum vel? Að sjálfsögðu geri ég það. Íslenskir lífeyrisþegar og þar með verkalýðshreyfingin vill hag þeirra sem bestan. En við ætlumst til þess að farið sé vel með þessa fjármuni og þá ekki síður þau völd sem fjármagnið veitir. Forsvarsmenn bankanna verða að geta tekið gagnrýni þegar þeir ögra samfélaginu."

 

Ögmundur minnti einnig á að ein ástæðan fyrir því að VG hefði viljað hafa þjóðarbanka væri einmitt sú að forðast að bankarnir yrðu fluttir úr landi. Því miður væri það smám saman að gerast. Þannig væri eignarhald Landsbankans nú komið 70% úr landi. Lífeyrissjóðirnir væru hins vegar ekkert á leið úr landi.

 

Mér þótti boðskapur Ögmundar Jónassonar vera trúverðugur og heyrði ég ekki betur en fundarmönnum þætti það líka. Þeim mun ómerkilegri held ég að sanngjörnu fólki þyki auglýsingar Framsóknar sem byggja á skrumskælingu og útúrsnúningum. 

 

Bankarnir og aðrar fjármálastofnanir eru mikilvægar og okkur Vinstri grænum þykir nauðsynlegt að þær búi við gott starfsumhverfi.  Ekki síður viljum við tryggja góð starfskjör almennra starfsmanna þeirra og raunar alls launafólks í landinu.  Þar liggur trúnaður VG, öfugt við það sem á við um núverandi stjórnarflokka sem sannarlega þurfa að komast í langþráð frí.

 

Góð frammistaða VG kvenna í Kastljósi

Umhverfismál og atvinnu- og byggðamál voru viðfangsefni Kastljóssins í kvöld.  Fyrir hönd okkar Vinstri grænna, mættu Kolbrún Halldórsdóttir og Guðfríður Lilja Grétarsdóttir.

Kolbrún talaði um umhverfismálin og eins og  allir sem fylgst hafa með þjóðmálum vita, hefur Kolbrún verið í stafni þeirra sem barist hafa fyrir stefnubreytingu í þeim málum.  Hún hefur verið óþreytandi við að tala um mikilvægi sjálfbærrar þróunar, skuldbindingar okkar við komandi kynslóðir og náttúruna sem auðlind.  Öllu þessu kom hún vel til skila í þættinum og var augljóst að hún er vel heima í þessum málaflokki.

Guðfríður Lilja er að hasla sér völl í stjórnmálum nú í þessum kosningum.  Hún hefur heillað alla hvar sem hún kemur fram og í allri framgöngu geislar hún af gleði, sannfæringarkrafti og sterkri réttlætiskennd.  Í umræðum um atvinnu- og byggðamál lagði hún áherslu á að lausnir núverandi stjórnvalda byggðu á fortíðarhyggju, stóriðju með öllum þeim fórnum sem hún hefði í för með sér í stað þess að leggja rækt við uppbyggingu samgangna, fjarskipta, menntunar, nýsköpunar og þróunar, og styðja við sprotafyrirtæki sem allra víðast.

Vissulega reyndu talsmenn stjórnarflokkanna að koma fram sem frelsandi englar, nú leggur Framsókn fram stefnu um nýtingu og verndun í umhverfis- og orkumálum, þegar flokkurinn hefur gengið fram fyrir skjöldu í því að fórna mikilvægum náttúruperlum þjóðarinnar.  Sjálfstæðisflokkurinn virtist ekki hafa neina skýra stefnu í umhverfismálum og Samfylkingin lenti enn einu sinni í vandræðum með að skýra stefnu sína í þessum málaflokki og æpandi voru mismunandi svör fulltrúa flokksins í umhverfisþættinum annars vegar og atvinnuþættinum hins vegar við spurningu um álver við Húsavík.  Svo kenndi fulltrúi Framsóknar Sjálfstæðisflokknum eiginlega um allt sem ekki hefði tekist að gera í byggðamálum og vék sér undan allri ábyrgð í þjóðlendumálinu.

Þegar á heildina er litið var frammistaða okkar kvenna fín í kvöld.

Kosningabrella meirihlutans í borgarstjórn

Borgarstjóri hefur undirritað viljayfirlýsingu ásamt menntamálaráðherra og rektor Listaháskólans um lóðamál fyrir skólann í Vatnsmýri.  Það vekur athygli að á viljayfirlýsingunni er auð lína sem var ætluð staðfestingu fjármálaráðherra, en hann er greinilega ekki með í leiknum.

Ég hef gagnrýnt þessi vinnubrögð meirihlutans.  Þarna er verið að egna saman velunnurum Listaháskólans annars vegar og Náttúruminjasafns hins vegar.  Listaháskólinn þarf að sjálfsögðu að fá viðunandi lausn á sínum málum en hann vill helst vera í miðbænum en ekki í Vatnsmýri.

Sannleikurinn er sá að í gildandi skipulagi fyrir lóðina kemur fram að hún verði EINUNGIS nýtt fyrir Náttúruminjasafn eða starfsemi tengda Náttúrufræðistofnun.  Skyldi Listaháskólinn hafa vitað af því?  Meirihlutinn í borgarstjórn hefur ekki kynnt málið innan skipulagsráðs eða borgarráðs og gerir sig enn einu sinni sekan um gerræðisleg og ólýðræðisleg vinnubrögð.

Síðan til að kóróna allt þá kemur fram að Listaháskólinn megi ráðstafa lóðinni til þriðja aðila.  Sem þýðir að þessi lóð í Vatnsmýrinni, sem er eyrnamerkt Náttúrufræðistofnun og starfsemi á hennar vegum, verður áður en við er litið komin í lóðabraskdansinn. 

Þetta eru vinnubrögð Sjálfstæðisflokks og Framsóknarflokks þegar þeir leggja saman.  Væri ekki nær að leysa einfaldlega húsnæðismál Listaháskólans þar sem hann vill vera, t.d. á svokölluðum stjórnarráðsreit milli Sölvhólsgötu og Skúlagötu (þar sem skólinn er að hluta til nú) og þar sem hann vill vera.  Ef ríkið og ráðherrar Sjálfstæðisflokksins hafa einhvern minnsta áhuga á að leysa mál Listaháskólans þá geta þeir gert það á þessum reit, án þess að blanda málefnum Náttúrufræðistofnununar í það. 

Ég er ekki viss um að mál Náttúrufræðistofnunar séu sett í uppnám með vitund og vilja Listaháskólans.  Hverra hagsmuna er verið að gæta?

Frábær þáttur um Vinstri græn í sjónvarpi

Sjónvarpið sýndi í kvöld kynningarþátt um Vinstrihreyfinguna - grænt framboð.  Þar kynna Steingrímur J. Sigfússon, Katrín Jakobsdóttir, Benedikt Davíðsson og Guðfríður Lilja Grétarsdóttir helstu baráttumál flokksins.

Þátturinn var sérstaklega líflegur og skemmtilegur og var ólíku saman að jafna þegar myndband Sjálfstæðisflokksins kom í kjölfarið, sem reyndist þá vera mánudagsviðtal við Geir Haarde.

Kynningarþáttinn um VG má sjá hér.

Skemmtilegur fundur í Brimborg

Í hádeginu í dag var efnt til almenns stjórnmálafundar í bifreiðaumboðinu Brimborg.  Þetta var skemmtilegt frumkvæði hjá fyrirtækinu að bjóða fulltrúum allra framboða að koma og ræða um samgöngumál og málefni bílgreina.  Matsalurinn var þétt setinn og stemningin góð.

Þarna mætti ég fyrir hönd Vinstri grænna en aðrir frambjóðendur voru Össur Skarphéðinsson (S), Birgir Ármannsson (D), Jónína Bjartmarz (B), Magnús Þór Hafsteinsson (F) og Ómar Ragnarsson (I).  Mikið var rætt um samgöngumálin hér á höfuðborgarsvæðinu, Sundabrautina vitaskuld, Suðurlandsveg o.fl.  Umræðurnar snérust m.a. um fjármögnun, skattlagningu og syndaregistur ríkisstjórnarinnar í samgöngumálum höfuðborgarsvæðisins.

Birgir og Jónína voru í nokkurri vörn fyrir hönd stjórnarinnar, einkum Birgir, en Össur sótti hart að stjórnarflokkunum (var samt ekki alltaf mjög málefnalegur).  Ómar lét móðann másan og fór á flug eins og honum er lagið, talaði um lengdar- og breiddargjöld á bíla.

Af minni hálfu kom fram mikilvægi þess að skoða samgöngumálin í samhengi við umhverfismál, draga úr losun gróðurhúsalofttegunda, auka almenningssamgöngur og breyta skattlagningu bíla þannig að hún samræmist betur markmiðum í umhverfis- og umferðaröryggismálum.

Sem sagt, skemmtilegur fundur í Brimborg og vona að starfsfólkið þar hafi haft gagn og gaman að.