Kannað verði hvort rifta eigi samningi borgarinnar og Kópavogs.

Á fundi borgarráðs í morgun voru málefni Heiðmerkur til umræðu að beiðni fulltrúa Vinstri grænna. Á fundinum lagði ég fram svohljóðandi tillögu: 

“Í ljósi þess að Kópavogsbær hefur ráðist í framkvæmdir í Heiðmörk án þess að Reykjavíkurborg hafi gefið út framkvæmdaleyfi, Skógræktarfélag Reykjavíkur hefur kært Kópavogsbæ vegna framkvæmdanna og að viðræður borgarinnar og Kópavogs um viðunandi lausn hafa ekki skilað árangri, samþykkir borgarráð að fela borgarstjóra að kanna möguleika á að rifta samningi Reykjavíkur og Kópavogs frá því í september sl.” 

Afgreiðslu tillögunnar var frestað.  

Með þessari tillögu vilja Vinstri græn láta kanna, hvort unnt sé að rifta umræddum samningi með það fyrir augum að loka þeim sárum sem þegar eru orðin á viðkvæmu svæði í Heiðmörk, m.a. innan vatnsverndarsvæðis, og bæta þau náttúruspjöll sem unnin hafa verið.  Af viðbrögðum bæjaryfirvalda í Kópavogi við þessu máli, verður ekki séð að þau séu reiðubúin til að axla ábyrgð á frumhlaupi sínu og bæta fyrir það tjón sem þau hafa valdið, þrátt fyrir að bæði borgaryfirvöld og Skógræktarfélag Reykjavíkur hafi sýnt þolinmæði og sanngirni í samskiptum sínum við Kópavog.  VG telur mikilvægt að kanna réttarstöðu borgarinnar í þessu sambandi og hvort hugsanleg riftun á samningnum geti orðið til þess að flýta því að umhverfi og náttúra komist í viðunandi horf og komist verði hjá varanlegu tjóni vegna framkvæmdanna.

Athugasemdir

[Árni Þór Sigurðsson, 1.3.2007 kl. 22:55]

Sæll Ragnar (og takk fyrir síðast)!!

Hér er um að ræða lagalegt deiluefni, sem mér finnst mikilvægt að fá úr skorið sem fyrst, þau spjöll sem unnin hafa verið í landi Heiðmerkur þarf að lagfæra sem allra allra fyrst.  Til að hefja umrædda framkvæmd þurfti framkvæmdaleyfi að vera til staðar, framkvæmdaaðilinn þarf að sjálfsögðu að hlíta skógræktarlögum og nú segir Skipulagsstofnun að breyta þurfi aðalskipulagi.  Miðað við þessa lagalegu óvissu er það mín skoðun að borgin eigi að kanna hvort rétt geti verið að rifta samningnum, en ég vek athygli á því að tillaga okkar VG kveður ekki á um að það skuli gert.  Fyrst viljum við láta kanna alla lögformlega þætti málsins.  Við sjáum svo til.