Baugalín styrkir stöðu Sjálfstæðisflokksins

Hin nýja ríkisstjórn hefur tekið á sig mynd.  Það er ljóst að hlutur Samfylkingarinnar varðandi skiptingu ráðuneyta er rýrari en hlutur Framsóknarflokksins var í fráfarandi stjórn.  Sjálfstæðisflokkurinn fær í raun 7 ráðuneyti og Samfylking 5 í stað helmingaskipta sem áður ríktu.

Sjálfstæðisflokkurinn fær bæði sjávarútvegs- og landbúnaðarráðuneyti en Samfylkingin mun þurfa að skipta iðnaðar- og viðskiptaráðuneytinu upp í tvennt milli Össurar og Björgvins.  Auk forsætis- og fjármálaráðuneyta fær Sjálfstæðisflokkurinn útgjaldafrekustu ráðuneytin, heilbrigðisráðuneyti og menntamálaráðuneyti og þegar hefur nýr heilbrigðisráðherra lýst yfir því að hafin verði einkavæðing í heilbrigðisgeiranum.

Ekki verður annað séð en að hin nýja ríkisstjórn og verkaskipting innan hennar styrki stöðu Sjálfstæðisflokksins mjög og gleymdar eru allar heitstrengingar um hlutverk Samfylkingarinnar í íslenskum stjórnmálum.  Ég man a.m.k. ekki eftir því að þar hafi verið lagt upp með að Samfylkingin ætti að auka vægi Sjálfstæðisflokksins og tryggja setu hans á valdastólum.  En allt um það.  Samfylkingin hefur þá um leið tekið sér sömu stöðu og Alþýðuflokkurinn hafði í Viðreisn og Viðeyjarstjórn, sem hækja eða göngugrind Sjálfstæðisflokksins. 

Við völdum mun nú taka enn ein hægri stjórnin, stjórn auðvalds og sérhyggju, ójafnvægis í byggðamálum og tvískinnungs í umhverfismálum.  Sjálfsagt er þó, með hagsmuni lands og þjóðar að leiðarljósi, að vonast eftir því að stjórninni farnist vel.  Stjórnarandstaðan mun þau ef að líkum lætur hafa í nógu að snúast.

Athugasemdir

[Katrín Anna Guðmundsdóttir, 23.5.2007 kl. 00:33]

Af hverju viltu nota orðið Baugalín? Mér finnst það frekar neikvætt að nota það í þessu samhengi. Baugalín var dulnefni konunnar sem skrifaði bókina Launhelgi lyganna - um kynferðisofbeldi sem hún var beitt. Mér hefur ekki tekist að grafa upp uppruna orðsins en ég held að þetta tengist höfuðfatnaði kvenna hér á öldum áður... s.s. skotthúfunni. 

Þetta er sem sagt fallegt orð og leitt ef það verður notað í neikvæðri merkingu.  Datt í hug að koma þessu á framfæri áður en nafnið festist í sessi....

[Jónína Benediktsdóttir (IP-tala skráð) 23.5.2007 kl. 00:40]

Vegna þess að Ingibjörg valdi Björgvin umfram Ágúst Ólaf.

[Björn Viðarsson, 23.5.2007 kl. 10:05]

Mikið er höfundur bitur.

[Einar Jónsson, 23.5.2007 kl. 22:22]

Átakanlegt að sjá þessa veruleikafirringu sem virðist hafa heltekið þig Árni. Þú þyrftir að fara á þagnarhelgi á Skálholti og hugsa þinn gang. Veltu til að mynda fyrir þér þinni pólítísku fortíð; þinn lokasprettur í R-lista samstarfinu var nú ekki glæsilegur. Hættu núna þessum biturleikabarlómi! 

[Ólafur Sveinn Haraldsson (IP-tala skráð) 25.5.2007 kl. 19:38]

Það er eins gott að Framsóknarflokkur og Vinstri grænir stilli saman strengi, því aldrei hefur verið jafnmikil þörf á harðri stjórnarandstöðu og nú. Nú hafa sjálfstæðismenn "stjórn" á bæði heilbrigðis- og menntamálum.