Vandinn á Vestfjörðum

Fréttir berast af erfiðleikum í atvinnumálum á Vestfjörðum.  Nú síðast er það sjávarútvegsfyrirtækið Kambur á Flateyri sem hefur sagt upp starfsfólki og kvótinn væntanlega á leið burt.  Bæjarstjórinn telur að vísu að bærinn eigi að nýta forkaupsrétt og tryggja að veiðiheimildirnar verði áfram á staðnum.  Við sjáum hvað setur í því efni.

Öllum er hygg ég löngu ljóst að fyrirkomulag fiskveiðistjórnunarmála, kvótakerfið og einkum framsalið, á drjúgan þátt í hvernig komið er fyrir mörgum sjávarbyggðum vítt og breitt um landið.  Stjórnvöld hafa því miður ekki horfst í augu við rætur vandans og líklega eru of áhrifamiklir hagsmunaaðilar í kringum stjórnarflokkana, einkum Sjálfstæðisflokkinn, til þess að nokkuð verði að gert.

Á undanförnum árum hefur Samfylkingin haldið uppi harðri gagnrýni á stjórnkerfi fiskveiðimála og lýst ásetningi sínum að gera verulegar breytingar á því ef flokkurinn kæmist í aðstöðu til þess.  Nú er flokkurinn kominn í ríkisstjórn, að vísu hægri stjórn með Sjálfstæðisflokknum, en engu að síður hljóta þær kröfur að vera gerðar að til aðgerða verði gripið til að taka til í þessu rangláta kerfi. 

Því miður gefur stjórnarsáttmálinn nýi engin fyrirheit um að svo verði gert.  Stefnumið Samfylkingarinnar í sjávarútvegsmálum hafa í engu ratað inn í þann sáttmála, frekar en í mörgum öðrum málaflokkum.  Vandinn á Vestfjörðum er þess eðlis að það þolir enga bið að á honum verði tekið.  Vinstri græn munu í stjórnarandstöðu beita sér fyrir því að málefni Vestfjarða sérstaklega verði tekin til umræðu og viðunandi og varanlegra lausna leitað.  Það mun ekki veita af kröftugu aðhaldi við þá ríkisstjórn sem nú er að stíga sín fyrstu skref, henni þarf að halda við efnið.

Athugasemdir

[Hafsteinn Viðar Ásgeirsson, 25.5.2007 kl. 20:33]

Ertu að reyna að segja í þessu tilskrifi að ef VG væri hækjan þá væru langir bálkar í sáttmála um nýtt og betra kvótakerfi, það er vægt til orða tekið, að ég leyfi mér nú stórlega að efast um það og það hvarflar ekki að mér eitt andartak, enda aldrei heyrt hvað þið væruð að standa fyrir í þeim málum....?

[Sigurður Jóhann Hafberg, 26.5.2007 kl. 02:25]

Sæll Árni ,Hafsteinn og Bjarni.

Ég verð nú að byrja á því að segja að mér hefur löngum þótt Árni Þór einna trúverðugastur af vinstri grænum. Sjálfur fylgi ég frjálslyndaflokknum  eins og Hafsteinn og er líka Manchestermaður.

Ég er fæddur og uppalinn á Flateyri hef búið hér alla mína tíð síðan 1959 og vona að ég geti verið hér áfram.

Ekki óraði okkur fyrir þessum ósköpum. Okkur hafði verið talin trú um að hér væri mikill uppgangur, fyrirtækið væri að eflast og styrkjast eins og Einar Kristinn talaði fyrir kosningar. Svo koma þessar fréttir eins og skrattinn úr sauðaleggnum. Var hann að skrökva eða vissi hann ekki betur?

Ég byrjaði að beita fyrir Einar Odd 1974 var til sjós á línubátunum hjá Hjálmi og ég var 7 ár á Togaranum sem hann gerði út.

1991 til 1994 gerði ég út 26 tonna línu og snurvoðabát og lagði upp til skiptis hjá Hjálmi og gamla kambi. Síðan hef ég ýmislegt brallað og er ekki enn kominn að því að gefast upp þó á móti blási. Þessar persónulegu upplýsingar set ég hér inn til að réttlæta innkomu mína að þessari umræðu.

Víkjum þá aftur að grein Árna. Ég er ekki í nokkrum vafa um að hann meini það sem hann er að tala um. Ég tek undir með honum að það eru ekki mikil fyrirheit í stjórnarsáttmálanum um að  tekið verði á þessu máli.

Engu að síður vil ég leyfa mér að haf þá trú þangað til annað kemur í ljós að innan samfylkingarinnar sé gott fólk sem vill taka á þessu. Ég veit að vinur minn hann Kalli matt gamli trillukarlinn mun beita sér í þessu máli.

Því miður finnst mér þetta brölt í blessuðum bæjarstjóranum á Ísafirði þessa dagana ekki trúverðust miðað við fyrri reynslu af þeim dreng. Mér sýnist hann vera að skreyta sig ófleygum fjöðrum. En sjáum hvað setur vonandi hef ég rangt fyrir mér

Að lokum ætla ég að setja hér vísu sem ég orti fyrir ca 25 árum þegar Hinrik Kristjánsson var verkstjóri hjá Einari Odd. Hinni og Stebbi Dan sem var netamaður á Gylli voru á röltinu um bryggjuna og voru eitthvað að rífast.

Röltu um bryggju og ræddust við

ræfilslegir sveinar.

Hinrik strauk um harðan kvið

og hótað´(i) að ná í Einar

kv sig haf

[Árni Þór Sigurðsson, 26.5.2007 kl. 08:30]

Takk fyrir athugasemdir.  Vil bara árétta að skrif mín fjalla um vandann á Vestfjörðum og hvaða fyrirheit nýr stjórnarsáttmáli gefur í málum sjávarútvegsins að mínu mati.  Ég var ekki að fjalla um stefnu VG í þessum málum - amk. ekki að þessu sinni.  Mér finnst því að athugasemdirnar eigi að lúta að því sem ég skrifa - ekki einhverju sem ég er EKKI að skrifa um.  Og takk fyrir góð orð í minn garð Sigurður. Kveðja

[Hafsteinn Viðar Ásgeirsson, 26.5.2007 kl. 12:26]

Mér finnst Árni, skifta meira máli hvernig verður unnið úr þessum sáttmála sem ég lít frekar á sem einhvern ramma um framtíðarmúsík en nokkuð annað. Þú segir að Samfylking hafi gagnrýnt kvótakerfið í þessari mynd harðlega og ég held að við séum allir sammála um að það er ógæfa Flateyrar og fjölmargra annara sjávarbyggða allt í kring um landið, kvótakerfi Framsóknar og andskotans. Ég vil halda, þangað til annað kemur í ljós að andúð Samfylkingarfólks á þessu kerfi geti hjápað til við að fá fram á því breytingar einmitt vegna þess að það myndar ríkisstjórn, það er nefnilega lykillinn að því að geta náð fram breyttum áherslum við stjórn landsins.

Ég er að öðru leiti alveg sammála þér hvað það varðar, að stefna VG varðandi sjávarútvegsmál eða nokkuð annað hefur voða lítið að segja næstu 4 árin að minnsta kosti og þessvegna þurfum við ekkert að vera að blanda henni í athugasemdir okkar. En ég tek undir með Sigurði, að Bæjarstjórinn á Ísafirði er ekki líklegur til afreka á svæðinu, pappakassinn sá hefur nú ekki unnið stórafrek hingað til og þar af leiðir að fólkið hefur ekki annað að horfa, en til áðurnefndrar þekktrar andstöðu Samfylkingar við þetta guðsvolaða kerf og áhrifa þeirra í ríkisstjórn með Einari Kristni og öðru góðu fólki...

[Jóhannes Ragnarsson, 27.5.2007 kl. 10:13]

Ef ég segi eins og er, þá er ég mjög vonsvikinn yfir lítilfjörlegum áhuga VG á sjávarútvegsmálum. Að vísu á flokkurinn í fórum sínum átta ára gamla stefnu í fiskveiðistjórnarmálum sem verður að skoðast sem ágætur umræðugrundvöllur í þeim málaflokki. Af hverju VG hefur ekki látið meira til sín taka í sjávarútvegsmálum hef ég ekki hugmynd um, en ekki er samt öll nótt úti fyrir flokkinn að láta almennilega til sín taka á þeim vettvangi og ég sé ekki betur á skrifum Árna Þórs, en að hann sé tilbúinn í þann slag.

Sjávarútvegur á Íslandi grundvallast á fisveiðistjórnunarkerfi, sem er sannkölluð gróðrastía fyrir spillingu, arðrán og hálfgerða mafíustarfsemi. Það er því mikið undrunarefni að vinstriflokkur eins og VG skuli ekki hafa eytt meira púðri, en raun ber vitni, í að berjast gegn þessu kerfi.