Ólæsi Staksteina

Staksteinar Morgunblaðsins er undarlegur penni.  Oftast er það hinn sami penni og párar forystugreinar blaðsins.  Það kemur nú æ betur í ljós að sá sem stýrir pennanum við Staksteina og leiðaraskrif Morgunblaðsins er ólæs á pólitík.  Öðruvísi mér áður brá!

Það hefur ekki farið fram hjá neinum sem á annað borð gluggar í Morgunblaðið endrum og eins að ritstjóri blaðsins er í sérstakri herferð gegn formanni Vinstri grænna, Steingrími J. Sigfússyni.  Hann hefur allt frá því vel fyrir kosningar lagt Steingrím í pólitískt einelti og gert allt sem í hans valdi hefur staðið til að koma höggi á hann.  Af einhverjum óútskýrðum ástæðum er það leiðangur ritstjóra Morgunblaðsins og skeytir hann þá hvorki um skömm né heiður til að ná því markmiði sínu.

Einkum hefur ritstjórinn látið það fara í taugarnar á sér að VG skuli ekki vera í ríkisstjórn og kennir hann þar formanni VG um og telur hann hafa klúðrað því máli.  Nú getur vel verið að það hafi verið draumur ritstjóra Mbl að Vinstri græn færu í ríkisstjórn og sú staðreynd að svo varð ekki, skýri ergelsi hans í því efni.  Það er þó sérstakt þegar haft er í huga að Viðreisnarstjórnarmynstur hefur löngum verið þeim Morgunblaðsmönnum kært, og nú hafa þeir fengið það.  Staðreyndin er sú, að miðað við úrslit kosninganna, var varla við því að búast að önnur ríkisstjórn tæki við völdum en sú sem nú vermir stólana.  Það er einfaldlega vegna þess að svo margir og áhrifaríkir aðilar í bæði Sjálfstæðisflokki og Samfylkingu höfðu unnið að því bæði leynt og ljóst um margra vikna skeið fyrir kosningar.  Einkum voru það frjálshyggju- og fjármálamenn úr báðum flokkum sem þetta vildu og Geir H. Haarde var settur upp við vegg.  Ingibjörg Sólrún hefur í nýlegu blaðaviðtali gefið sterklega í skyn að hún hafi aldrei ætlað sér að vinna með VG og Framsókn.  Framganga VG og einstakra forystumanna þar á bæ fékk engu um þetta ráðið.  Er Staksteinahöfundur ólæs á þessa stöðu?

Í aðdraganda kosninga skrifaði Mbl margoft um það að hið nýja framboð Íslandshreyfingarinnar myndi verða VG skeinuhætt og taka fylgi frá flokknum.  Staðreyndin er sú að Í-listinn fékk milli 3 og 4% og flest bendir til að þau hafi að mestu komið frá kjósendum sem ella hefðu kosið VG.  En nú talar ritstjóri Mbl bara um klúður forystu VG en virðist algerlega horfa framhjá áhrifaþáttum sem hann sjálfur vakti máls á fyrir kosningar.  Það hentar bersýnilega ekki þeim sýndarveruleika sem ritstjórinn er að reyna að framkalla.

Nú um helgina var haldinn flokksráðsfundur VG á Flúðum.  Ritstjóri Morgunblaðsins gerir fundinn að umtalsefni og gagnrýnir þar m.a. formanninn fyrir að hafa ekki skynjað misskiptinguna í samfélaginu og skilað auðu í því máli.  Vísar hann m.a. til ræðu formannsins máli sínu til stuðnings.  Nú þykist ég vita að Morgunblaðinu hafi verið send ræðan og kemur þá berlega í ljós ólæsi ritstjórans.  Sannleikurinn er sá að formaðurinn talaði einmitt um þetta atriði og minnti á mikilvægi þess að VG stæði vörð um velferðarkerfið.  Hvaða ræðu var ritstjóri Morgunblaðsins að lesa?  Úr því að Mbl lætur sér svona annt um innri málefni VG, hví var þá blaðið ekki með útsendara sinn á staðnum, eins og t.d. útvarpið?  Þá hefði blaðið getað skynjað beint stemninguna á fundinum og heyrt það sem sagt var.  En kannski var ritstjórinn einfaldlega búinn að ákveða fyrir löngu hvað hann myndi skrifa um fundinn og skeytti því engu hvað þar var sagt og samþykkt.

Í forystugrein fabúlerar ritstjórinn um að formaður VG muni hætta fyrr en síðar og almenn samstaða sé um arftaka hans.  Hvaða tilgangi þjóna þessar vangaveltur?  Augljósa ekki þeim að gagnast draumakandidat ritstjórans því í VG verður það varla talið mönnum til tekna að vera blessaðir í bak og fyrir af Morgunblaðinu.  Er ritstjórinn ólæs á það?  Eða er tilgangur hans etv. að hampa einum einstaklingi sérstaklega til þess að geta síðar ráðist á þann sama einstakling af sama offorsi og blaðið hefur gert gagnvart núverandi formanni?

Í mínum huga er vegferð ritstjóra Mbl augljós.  Hann vill helst koma illu til leiðar innan VG, skapa togsteitu og tortryggni og reyna eftir fremsta megni að veikja helstu forystumenn flokksins.  Það telur hann sig best gera með því að ráðast hatrammlega að Steingrími og hampa Svandísi - amk. í dag.  Sú afstaða getur hæglega snúist á morgun.  En flokksmenn VG skynja þetta.  Og ef Mbl hefði verið á vettvangi á flokksráðsfundinum um helgina hefði það líka áttað sig á þessu.  Þar var gríðarlega góð stemning, eindrægni og baráttuandi.  Milli 30 og 40 félagar úr forystusveit flokksins vítt og breitt um landið héldu ræður á fundinum og fékk formaður flokksins og aðrir í fremstu röð einróma stuðning og hvatningu.  Þar var engan bilbug að finna.  En ritstjóri Morgunblaðsins hefði orðið vonsvikinn.  Þess vegna vildi hann ekki að neinn af blaðinu fylgdist með fundinum og flytti fréttir af því sem þar var raunverulega sagt og gert.

Staksteinahöfundi (sem ég tel öllu jöfnu vera ritstjóra Morgunblaðisins) er farið að fatast flugið í pólitískri átthagafræði.  Hann er einfaldlega orðinn ólæs á stöðu mála.  Hann hefur ákveðið að ráðast að VG og formanninum sérstaklega og þá má sannleikurinn sín lítils.  Svo virðist hann nú einnig ætla að taka Framsóknarflokkinn sömu tökum.  Slíkan leiðangur lagði hann aldrei í gagnvart Halldóri Ásgrímssyni enda þjónaði það þá ekki pólitískum markmiðum blaðsins.  Og Samfylkingin er nú komin í hlé sem samstarfsaðili Sjálfstæðisflokksins, jafnvel þótt flokkurinn hafi nú formlega gefist upp á að sinna hlutverki sínu sem forystuafl og höfuðandstæðingur Sjálfstæðisflokksins í íslenskum stjórnmálum.  Sjálfstæðisflokkinn þarf varla að nefna í þessu samhengi, Morgunblaðið stendur vörð um sitt fólk. 

Svona getur farið fyrir hinu mætasta fólki.  Þegar gremjan tekur völd helgar tilgangurinn meðalið.  Þá er illa komið, en líklega er ritstjórinn einfaldlega að ergja sig yfir því að hann á skammt eftir á ritstjórastóli.  Hvort eitthvað betra tekur við er þó engan veginn víst.

En það sem skiptir öllu fyrir okkur í VG er einfaldlega sú staðreynd að Morgunblaðið stýrir engu í okkar herbúðum, flokksmenn láta ekki ögranir blaðsins slá sig út af laginu.  Við munum halda okkar striki og takast á við þau mikilvægu pólitísku verkefni sem bíða, af nógu er að taka, og nýta til þess þann gríðarlega aukna styrk og stuðning sem við fengum í kosningunum í vor og látum það ekki trufla að sá kosningasigur sé Morgunblaðinu hulinn.  Það er vandamál blaðsins en ekki Vinstri grænna.

 

Athugasemdir

[Hlynur Hallsson, 3.9.2007 kl. 09:01]

Takk fyrir góða pistil Árni Þór. Þú hittir einmitt naglann á höfuðið. Skrif staksteinahöfundar eru í meira lagi vandræðaleg fyrir Moggann. Bestu kveðjur,

[Jóhannes Ragnarsson, 3.9.2007 kl. 12:11]

Einkennilegur langhundur atarna hjá þér Árni Þór. Fyrir það fyrsta fæ ég ekki betur séð en staksteinahöfundur morgunblaðsins sé a.m.k. jafn læs á pólitík og þú og þínir viðhlægjendur í VG. Að öðru leyti þarf eingann sérstakann fræðing til að sjá og skynja að VG er stjórnmálaflokkur í heilmiklum vanda. Staða Steingríms J. hefur veikst mjög mikið gagnvart fólkinu í landinu og hver veit nema flokkseigendaelítan, sem þú og fleiri nudda sér utan í, taki þá ákvörðun að leysa Steingrím undan oki formennskunnar og tylla Svandísi í hásætið í staðinn.  En þar með er ekki öll sagan sögð. Vandi VG felst e.t.v. fyrst og fremst í þeirri staðreynd, að flokkurinn er fyrist og fremst óalþýðlegur flokkur menntamanna og efristéttafemínísta þar sem stéttarbarátta og verkalýðshyggja léttvæg fundin og fótum troðin. Í því ljósi er VG fjandi vel úr takti við fólkið í landinu, alþýðuna.

Ég verð bara að segja Árni minn Þór, að þið plat-vinstrimennirnir ættuð að sjá sóma ykkar í að breyta nafni flokksins, sem þið eigið hvort sem er öll hlutabréfin í, og kallið hann ,,Miðjuhreyfinguna grænt framboð" eða ,,Græna Kvenfélagið."   

[Bjarni Kjartansson, 3.9.2007 kl. 12:16]

Bæði er, að við Íhaldsmenn, af svonefndum ,,gamla skóla", vildum ekkert frekar en hefja samstarf við ykkur, enda margt þjóðhollra manna hjá ykkur og orðheldinna.

Gjamm og gutl hefur því miður nokkuð aukist með sífri um kvenréttindi og kvennapólitíkk.  Það er lítt grundað hjá mörgum áhrifa mönnuminnan ykkar raða og ber við, nokkrum öfgum hjá sumum.  Þetta dregur úr vilja margra yngri ,,frjálshyggjumanna" til Nýsköpunarstjórnarmynstursins.

Ég er þess þó fullviss, að þegar í stjón væri komið, væru menn á ykkar bæ, jafn stjórntækir og ýmsir í röðum Samfó.  Því miður varð raunin á, að samstjórn sú sem nú er i hugum manna.  Ég tel það ekkert gæfuspor fyrir mína afkomendur.  Þarna eru of margir Kalmarsambandssinnar, sem vilja óðar afhenda flest ef ekki allt í Kratapulliuna í Evrópu.

Orheldni er eiginleiki, sem er Bráðnauðsynlegur en mér er til efs, að Samfó reiði slíkt í þverpokum.

Miðbæjaríhaldið

[Árni Gunnarsson, 3.9.2007 kl. 17:46]

Það er margt í stefnumálum V.G. sem mér er að skapi. Auk þess hef ég kynnst því að þar er fjölgáfað og vel menntað afbragðsfólk innan raða forystunnar. Aldrei mun ég efast um heillyndi Ögmundar J. í kjarabaráttu láglaunastétta. Einhvern klaufaskap má ugglaust finna í málflutningi umhverfismála en þar er flokkurinn þó heils hugar í baráttunni að minni hyggju.

En í sambandi við ólæsi Staksteinahöfundar kemur mér í hug gamalt mismæli í lofræðu um Ólaf Thors foringja Flokksins á þeim tíma:

"Og varð Ólafur snemma ólæs."