Undanhaldið hafið

Ríkisútvarpið hefur greint frá því að stjórn Reykjavík Energy Investment hafi ákveðið að öllum starfsmönnum verði nú gefið færi á að kaupa hlut í fyrirtækinu á sama gengi.  Það er augljóst að kaupréttarsamningarnir sem voru gerðir við fyrirmennin þola ekki dagsljósið og því hefur stjórnin ákveðið að hopa.

Undanhaldið í þessu hneykslismáli er hafið.  Borgarfulltrúar Sjálfstæðisflokksins ná ekki upp í nefið á sér og vilja bersýnilega ekki bera ábyrgð á því pólitíska drullumalli sem hér er á ferðinni.  Og Björn Bjarnason leggur þeim lið.  Vafalaust munu helstu fjármálagúrúar landsins telja þetta stærsta viðskiptasamning Íslandssögunnar og þeir sem eru bak við tjöldin fagna sigri - það skyldi aldrei fara svo að það verði Pýrrhosarsigur græðgisaflanna sem vilja komast yfir eignir þjóðarinnar fyrir slikk?

Svandís Svavarsdóttir borgarfulltrúi Vinstri grænna heldur uppi málstað borgarbúa og landsmanna allra í þessu máli.  Hún hefur fengið geysilega mikinn stuðning hvaðanæva að, langt út fyrir raðir síns eigin flokks.  Fólki blöskrar og það setur nú traust sitt á hana.  Hún stendur sannarlega undir því.  Fyrir utan hneykslið með kaupréttarsamningana var fundurinn sem ákvað sameiningu Reykjavik Energy Investment og Geysir Green Energy kolólöglegur og ákvörðun hans um sameiningu þar með einnig.  Og á það verður látið reyna.  Það er ekki hægt að horfa hnípinn upp á fjármagnseigendur í landinu hirða eignir almennings í þágu eigin gróða.  Nú verður spyrnt við fótum!

Finnur fyrir mikilli reiði í samfélaginu

Athugasemdir

[Sævar Helgason, 6.10.2007 kl. 19:11]

Að stinga dúsu uppí starfsmenn Orkuveitu , er það málið og leyfa þeim að kaupa einhver hlut í sukkinu ?  Nýjustu fréttir herma  að þetta kaup/sölulið telji að þá hafi þeir sitt plott í góðu.

Þetta mál er orðið þvílíkt reginhneyksli að riftun  á þessum "samningi " er ein fær leið , slíta öllu samstarfi við þessa gróðapúnga.

Ég styð eindregið við bakið á Svandísi Svavarsdóttur í baráttu hennar gegn sjálftökuöflunum varðandi Orkuveituna

[Ólafur Þórðarson, 7.10.2007 kl. 02:52]

Milton Friedmann holdgerfist hér í allri sinni fegurð. Til hamingju með daginn.

[Valgerður Benediktsdóttir, 7.10.2007 kl. 15:01]

"Það er augljóst að kaupréttarsamningarnir sem voru gerðir við fyrirmennin þola ekki dagsljósið ..."

Kæri Árni,

værir þú ekki til í að nafngreina þessi fyrirmenni sem þú talar um?

Eiginmaður minn, Grímur Björnsson jarðeðlisfræðingur, er einn þeirra sex lykilstarfsmanna hjá Orkuveitu Reykjavíkur sem boðið var að kaupa hlutabréf í REI fyrir 10 milljónir króna á genginu 1.27. Hann stendur allt í einu frammi fyrir því að ráðist er að honum úr öllum áttum fyrir spillingu. Hvað gerði hann að slíkum spillingarmanni að mannorð hans taldist þess eðlis að það skyldi tekið af honum á opinberum vettvangi?Grímur er einn af fremstu vísindamönnum á sínu sviði á heimsvísu. Hann hefur árum saman rannsakað svæði víða um heim sem henta munu til jarðvarmaframleiðslu og notað til þess þekkingu sína og reynslu sem er milljarða virði. Hann hefur komið í framkvæmd risaverkefnum sem miða að því að minnka eyðingu regnskóganna og efla þróunarhjálp og bæta líf fólks hér á jörð með jarðhita í stað olíu og kola. Hann hefur þjálfað nemendur í Jarðhitaskóla Sameinuðu þjóðanna í tvo áratugi og unnið náið með þeim æ síðan, við uppbyggingu í heimalöndum þeirra. Það hefur haft á hann mikil áhrif að þekkja þetta fólk sem hefur þurft að berjast fyrir að fá að mennta sig og jafnvel staðið með byssukjafta framan í sér en ætíð brotist áfram til að vinna jörð sinni gagn.Ég spyr: Bað Grímur um að fá að kaupa hlutabréf í REI á sérkjörum fyrir ómetanlegt uppbyggingarstarf sitt og vinnu? Nei.Grímur Björnsson hefur ekki beðið um neitt. Og allra síst hefur hann beðið um að láta sverta mannorð sitt opinberlega. 

Hvenær drepur maður mann? Stórt er spurt. Það er hættulegt að sveifla hengingarólinni fyrir framan helstu vísindamenn okkar. Þökkum heldur fyrir að til skuli vera heiðarlegt fólk eins og Grímur sem hefur hugsjón til að láta gott af sér leiða með þrotlausri vinnu, heiminum til heilla. Hann er lentur í þessu ástandi vegna klúðurs annarra og á skilið að fá uppreisn æru.

Eflaust kann Grímur mér litlar þakkir fyrir að skrifa þér. Mér er hins vegar nóg boðið.

Með kveðju,

Valgerður Benediktsdóttir