Skynsemin ræður

Ákvörðun borgarráðs um að ógilda sameiningu REI og GGE er fagnaðarefni.  Með þeirri afstöðu viðurkennir borgarráð að ekki hafi verið staðið rétt að málum og að endurskoða þurfi málið frá grunni.  Sú vegferð, sem Svandís Svavarsdóttir hóf í kjölfar hins margumrædda eigendafundar OR í byrjun október, er að skila áþreifanlegum árangri.  Fyrst féll meirihlutinn í borgarstjórn og nú hefur nýr öflugur meirihluti tekið á málinu af myndarskap.

Borgarráð og einstakir borgarfulltrúar geta verið stoltir af ákvörðun sinni.  Þar ber enginn skarðan hlut frá borði, það er enginn sem tapar.  Skynsemin ræður för og það munu allir standa uppi sem sigurvegarar í kjölfarið.  Burtséð frá því hvaða skoðun einstaklingar kunna að hafa haft í upphafi, þá hefur skoðun málsins leitt í ljós að það var ekki vel undirbúið, lýðræðislegir ferlar voru ekki haldnir og ýmislegt í málinu efnislega orkaði tvímælis.  Það er bara stórmannlegt að þeir sem stóðu að ákvörðunum eigendafundar OR 3. október skuli nú standa einróma að þessari niðurstöðu borgarráðs.

Það er líka ánægjulegt að sjá að í borgarstjórn er nú þverpólitísk samstaða um að setja hagsmuni almennings í fyrirrúm og tryggja aðkomu lýðræðislega kjörinna fulltrúa að ákvörðunum.  Full ástæða er til að óska stýrihópi Svandísar og borgarráði öllu til hamingju með farsæla niðurstöðu í dag.

Borgarráð samþykkir að hafna samruna REI og Geysis Green

Athugasemdir

[Sigurður Viktor Úlfarsson, 2.11.2007 kl. 13:50]

Það er ekki búið að ákveða neitt nema að rifta öllu.  Nú ríkir bara óvissa um framhaldið.  Svandís og félagar ákváðu að stoppa en sögðu ekkert hvað þau ætluðu að gera svo.  Þangað til það svar kemur er allt málið í óvissu, væntanlega svo vikum skiptir.  Slíkt teljast ekki góðir stjórnunarhættir.