Médvédév kjörinn forseti Rússlands - Медведев набирает 69% голосов

Eins og vænta mátti verður Dmítríj Médvédév næsti forseti Rússlands.  Þegar talin höfðu verið um 60% atkvæða hafði hann hlotið tæp 69% og afgerandi stuðning.  Médvédév er 1. varaforsætisráðherra landsins og náinn bandamaður Vladímírs Pútíns fráfarandi forseta og hefur hinn nýi forseti lýst því yfir að hann muni gera Pútín að forsætisráðherra í nýrri ríkisstjórn. Um þetta má m.a. lesa á vefútgáfu dagblaðsins Ízvéstíja.

Dmítríj Médvédév er lögfræðingur frá Pétursborg og kynntist Pútín í störfum sínum þar.  Flestir fréttaskýrendur telja að Pútín muni áfram vera við völd og í raun stjórna öllu í gegnum hinn nýja forseta.  Vegna náinna tengsla þeirra tveggja er líklegt að áhrifa Pútíns muni gæta sterklega í rússneskum stjórnmálum á næstunni, ekki síst ef hann verður þaulsætinn sem forsætisráðherra (raunar hafa fáir verið það í Rússlandi undanfarin ár). Hinu má þó ekki gleyma að forseti Rússlands er afar valdamikill og hann hefur utanríkis- og alþjóðamálin í sínum höndum og hann hefur ekki bakgrunn úr öryggislögreglunni eins og fráfarandi forseti.  Því er allt eins líklegt að Médvédév muni reyna að treysta völd sín, styrkja stöðu sína og sjálfstæði og það kæmi mér ekki á óvart að honum muni takast að verða raunverulegur forseti, með þeim völdum og þeirri ábyrgð sem því fylgir. Það verður í öllu falli fróðlegt að fylgjast með hinum nýja forseta á næstunni, en forsetaskiptin fara fram í byrjun maí.

 

Athugasemdir

[Vilhjálmur Örn Vilhjálmsson, 3.3.2008 kl. 07:52]

Hæl sé þér Laissez, en meintir þú ekki að engar fréttir frá Rússlandi væru góðar fréttir. Medvedev, þetta litla grey, er bara varta á rassinum á Pútínusi

[Theódór Norðkvist, 3.3.2008 kl. 13:55]

Er Rússland nokkuð annað en víti til varnaðar fyrir þá sem vilja að sósíalísk viðhorf séu ráðandi?

Sovétríkin voru eitt mesta kúgunar- og harðstjórnarríki mannkynssögunnar og mannréttindi í Rússlandi nútímans hafa ekki verið nema til að gráta yfir.