Styðjum sjálfsbjargarviðleitni Osseta

Allt frá því í byrjun tíunda áratugar síðustu aldar hafa Ossetar í Suður-Ossetíu barist fyrir því að sameinast löndum sínum í Norður-Ossetíu.  Georgíumenn og málsvarar þeirra á vesturlöndum, ríghalda hins vegar í ríkjaskipan sem Stalín kom á fót á fjórða áratug síðustu aldar.  Er ekki kominn tími til að segja skilið við Stalín og virða vilja ibúanna sjálfra?

Það kemur vitaskuld ekki á óvart að Bandaríkjastjórn vilji að Rússar dragi sig út úr Suður-Ossetíu.  Markmið Bandaríkjanna er að koma Georgíu inn í NATO eins og kunnugt er.  En á það er að  líta að allt að 90% íbúa Suður-Ossetíu hafa rússneskt ríkisfang.  Og örlög þeirra íbúa koma því Rússum sannarlega við, hvort sem mönnum líkar það betur eða verr.  Landamærin sem Georgíumenn tóku sér við fall Sovétríkjanna hafa að vísu verið viðurkennd af alþjóðasamfélaginu.  En Ossetar sjálfir hafa alla tíð mótmælt þeim og ekki kært sig um að vera innan vébanda Georgíu.  Enda eru Ossetar sjálfstæð þjóð, sem eigin sögu, menningu og tungumál.  Og eiga ekkert síður rétt á að sameinast löndum sínum í Norður-Ossetíu en t.d. Kosovobúar að lýsa yfir sjálfstæði, eða að Þjóðverjar voru sameinaðir eftir fall Berlínarmúrsins.

Við Íslendingar brugðumst skjótt við þegar Eistland, Lettland og Litháen lýstu yfir sjálfstæði við fall Sovétríkjanna.  Við höfum líka viðurkennt sjálfstæði Kosovo.  Og við eigum nú að sýna sama dug og kjark og styðja baráttu Osseta í Suður-Ossetíu sem vilja ráða málum sínum sjálfir.  Það er okkur ekki sæmandi að mismuna þjóðum eftir því hvað hentar hernaðarhagsmunum stórveldanna hverju sinni.  Þjóðin sjálf á sinn rétt og við eigum að gerast málsvarar sjálfsákvörðunarréttar ossetísku þjóðarinnar.

Rice: Rússar yfirgefi Georgíu

Athugasemdir

[Pétur Guðmundur Ingimarsson (IP-tala skráð) 8.8.2008 kl. 21:15]

Nú hafa Suður Ossetar eigin her. Er það ekki algert bann við slíku í VG? Hafa þeir nokkra þörf fyrir hann?

[Hin Hliðin, 8.8.2008 kl. 21:27]

Af hverju kemur það ekkert á óvart að þingmaður VG skuli með þessum orðum styðja Rússa í þessum aðgerðum sínum.

[Bjarni Ben (IP-tala skráð) 9.8.2008 kl. 00:12]

Ég veit ekki betur en svo að Ossetar vilji fara yfir til Rússa með hervaldi og hryðjuverkum. Svo eiga Rússar alls ekkert með að lýsa yfir stríði við Georgíumenn! Nær að þrýsta á þá öðruvísi...

[Jón Valur Jensson, 9.8.2008 kl. 01:59]

Já, Pétur, allt í einu er beiting hervalds orðin lofsverð og gefin sæmdarheitið "sjálfsbjargarviðleitni"! Af hverju getur þá Árni ekki litið á íslenzkar hervarnir sem eðlilega sjálfsbjargarviðleitni, rétt eins og Jón Sigurðsson (sá eini sanni) gerði?

[Sigurjón Þórðarson, 9.8.2008 kl. 13:22]

Mér finnst vera nokkuð herskár tónn í þessum skrifum Árni Þór.