Ögmundur í Kragann, Katrín í Reykjavík norður og Kolbrún í Reykjavík suður

Nú hefur kjörstjórn vegna framboðslista Vinstri grænna á höfuðborgarsvæðinu kynnt tillögu sína um skipan 5 efstu sætanna í kjördæmunum þremur.  Tillagan gerir ráð fyrir að Ögmundur Jónasson, formaður þingflokks VG, og ótvíræður sigurvegari forvalsins þann 2. desember sl., flytji sig um set og leiði lista flokksins í Suðvesturkjördæmi, Kraganum svonefnda.  Lagt er til að Guðfríður Lilja Grétarsdóttir skipi 2. sætið í kjördæminu.

Þá er lagt til að Katrín Jakobsdóttir varaformaður VG leiði listann í Reykjavíkurkjördæmi norður og að ég verði þar í öðru sæti, en Kolbrún Halldórsdóttir þingkona skipi fyrsta sæti í Reykjavík suður og Álfheiður Ingadóttir verði þar í öðru sæti.  Tillaga kjörstjórnar um skipan 5 efstu sætanna er þannig:

Reykjavík norður:                 Reykjavík suður:                    Suðvestur:

Katrín Jakobsdóttir                   Kolbrún Halldórsdóttir              Ögmundur Jónasson

Árni Þór Sigurðsson                 Álfheiður Ingadóttir                    Guðfríður Lilja Grétarsd.

Paul F. Nikolov                        Auður Lilja Erlingsdóttir             Gestur Svavarsson

Steinunn Þóra Árnadóttir          Guðmundur Magnússon             Mireya Samper

Kristín Tómasdóttir                   Jóhann Björnsson                      Andrea Ólafsdóttir

 

Engum blöðum er um það að fletta að þetta er góð og sterk niðurstaða hjá kjörstjórninni.  Ögmundur og Guðfríður Lilja taka að sér það hlutverk að leiða lista flokksins í Kraganum, en það á flokkurinn engan þingmann nú.  Sóknarfærin þar eru þó mikil og skv. skoðanakönnunum Gallup upp á síðkastið eigum við góða möguleika á tveimur þingmönnum í kjördæminu.  Í Reykjavíkurkjördæmunum eigum við líka góða von í tveimur þingmönnum í hvoru kjördæmi. 

Staða Vinstri grænna er sterk um þessar mundir.  Við megum hins vegar ekki taka neitt gefið fyrirfram og þurfum að halda vel á spilum, koma okkar góða málstað vel á framfæri og stefna að því að vinna góðan sigur í kosningunum í vor.  Markmið okkar hlýtur að vera að sjónarmið og áherslur Vinstri grænna komist rækilega að í landsstjórninni.  Til þess að svo megi verða, þarf VG að koma sterkt út úr kosningunum, með góða málefnastöðu og sterka frambjóðendur. 

Þeir framboðslistar sem þegar eru komnir fram lofa góðu og tillögur kjörstjórnarinnar hér á höfuðborgarsvæðinu eru gott framlag fyrir baráttuna sem framundan er.

Athugasemdir

[Þorsteinn Ingimarsson (IP-tala skráð) 30.12.2006 kl. 11:04]

Hvaða rugl er þetta í þér Árni! Hvaða þörf heldurðu að við kjósendur í Kraganum höfum að fá Reykvíkinga í efstu sæti framboðslistanna okkar. Við höfum nóg af fólki sjálf. Þetta virkar á mig eins og verið sé að bjarga þingmönnum VG í Reykjavík inná þing þar sem ekki er pláss fyrir alla ásamt því að reyna að endurnýja þingliðið. Skárri kostur hefði verið að VG þingmennirnir hefðu dreift á listann vinum sínum hjá Sjálfstæðisflokknum í Rvk. Þetta er auðvitað bara gamalkunnugt bragð þingmanna að dreifa sér í örugg þingsæti um landið til að detta ekki út.

Úr því að ég er nú að skrifa á bloggið þitt, þá er hérna eitt atriði. Þú fórst á sínum tíma í 6 mánaða ferð til Brussel,(sjálfur ESB andstæðingurinn) ferð sem kostaði  borgarbúa 9 milljónir. Til að kynna þér stjórnsýslu og sveitarstjórnarmál í ESB. Mér fannst aldrei þú vera heppilegasti maður til að fara, enda yfirlýstur ESB andtæðingur svo eðlilegra hefði verið að senda mann sem hefur áhuga á ESB. En hvað um það. Það sem mig langaði til að vita hvort þú hafir skilað einhverri skýrslu um ferðinna og hvort hún sé þá aðgengileg fyrir okkur hina til að lesa.

 kv.

[Árni Þór Sigurðsson, 30.12.2006 kl. 12:42]

Sæll Þorsteinn.  Hugsun okkar Vinstri grænna er að höfuðborgarsvæðið sé löngu orðið eitt atvinnu-, búsetu- og þjónustusvæði og það skipti íbúa svæðisins engu meginmáli hvar þingmenn þess eru búsettir.  Hitt sé meginmál hvaða stefnu sem fylgt og kjósendur taki þá afstöðu til málefnanna og þeirra fulltrúa sem bera stefnuna fram, en póstnúmerin skipti engu máli.  Auðvitað geta verið skiptar skoðanir um þetta en í mínum huga skiptir það íbúana t.d. í Mosfellsbæ litlu hvort þingmenn þeirra búa í Grafarvogi, Vesturbæ, Seltjarnarnesi eða Hafnarfirði.  O.s.frv.

Varðandi skýrsluna um Evrópska efnahagssvæðið og íslensk sveitarfélög þá má lesa skýrslu mína á vef Sambands íslenskra sveitarfélaga.  Vegna orða þinna er mikilvægt að gera sér grein fyrir að ég var að fjalla um hagsmuni íslenskra sveitarfélaga í tengslum við samninginn um Evrópska efnahagssvæðið sem er að sjálfsögðu í gildi og við Íslendingar erum bundnir af.  Það hefur ekkert með afstöðu mína eða annarra til Evrópusambandsins og aðildar okkar að því að gera.  Hlutverk mitt var fyrst og fremst að skoða áhrif samningsins á sveitarfélögin og hvernig þau gætu best gætt hagsmuna sinna gagnvart samningnum.  Hvet ég þig til að lesa skýrsluna.

kveðja, áþs.