Hálfsannleikur Arndísar

Í Morgunblaðinu í gær er grein eftir Arndísi Steinþórsdóttur, kennara og femínista, þar sem hún freistar þess að koma höggi á Vinstri græn.  Telur hún lítið fara fyrir femíniskum gildum hjá VG. Nú er út af fyrir sig ekkert að því að andstæðingar VG í stjórnmálum deili á flokkinn og finni á honum snögga bletti. Það er hins vegar málstað viðkomandi ekki til framdráttar að halla réttu máli og beita hálfsannleik í málflutningi sínum. Því miður hendir það Arndísi. 

Í grein sinni víkur hún sérstaklega að borgarmálum og telur að karlborgarfulltrúi VG (sem er undirritaður) hafi átt “meiri rétt” þegar kom að því að skipa í nefndir á vegum borgarinnar, m.a. sitji karlinn í borgarráði og karlinn hafi fengið alvöru “karladjobbin”, s.s. setu í stjórnum Orkuveitunnar og Faxaflóahöfnum.  Arndís hefði betur kynnt sér málið ögn betur áður en hún fleipar með þessa hluti.  Staðreyndin er sú að Svandís Svavarsdóttir situr sem oddviti VG í tveimur veigamestu ráðunum, menntaráði og skipulagsráði.  Ég sit í menningar- og ferðamálaráði og framkvæmdaráði. Hvað borgarráð snertir þá skiptum við með okkur setu í því, þannig að ég sit þar 1 ár en Svandís 3, en á móti situr Svandís 1 ár í forsætisnefnd og ég sit þar í 3 ár. Þetta er sama skipting í borgarráði og var hjá okkur í VG á síðasta kjörtímabili þegar ég sem oddviti sat 3 ár í borgarráði en Björk Vilhelmsdóttir, sem þá var borgarfulltrúi á vegum VG, sat þar 1 ár. Raunar viðhafði Samfylkingin sömu skiptingu þá, Stefán Jón Hafstein sem þá var oddviti þeirra sat 3 ár í borgarráði en Steinunn Valdís Óskarsdóttir sat þar í 1 ár. Um setu í stjórnum fyrirtækjanna er það að segja að ég sit í stjórn Faxaflóahafna fyrstu 2 ár kjörtímabilsins en þá tekur Svandís við og situr þar í eitt ár en Frjálslyndi flokkurinn á aðalsæti þar síðasta ár kjörtímabilsins en ekki VG.  Í stjórn Orkuveitunnar er þessu þannig farið að Frjálslyndi flokkurinn á aðalsæti þar 1. og 3. ár kjörtímabilsins en VG 2. og 4. ár. Svandís Svavarsdóttir er þar fulltrúi okkar í VG en ekki undirritaður eins og Arndís heldur fram. Með örlítilli vandvirkni og góðum vilja hefði Arndís getað komist hjá rangfærslum sínum. 

Fullt tilefni er til að fjalla nánar um önnur atriði í grein Arndísar, og einnig um það sem hún nefnir ekki. Til að mynda minnist hún ekkert á að undirritaður lagði, í anda femínískra gilda, kapp á að kona leiddi lista VG í borgarstjórnarkosningunum í vor eftir að hafa sjálfur gegnt oddvitastarfi flokksins í borgarmálum undanfarin ár. Og sömuleiðis að undirritaður átti ekki hvað sístan þátt í að Steinunn Valdís Óskarsdóttir varð borgarstjóri síðla árs 2004. En hún mátti ekki vera í forystuhlutverki fyrir sinn flokk áfram, og það vorum ekki við Vinstri græn sem sáum fyrir því! Um annað í grein Arndísar ætla ég ekki að fjalla nú, það bíður að sinni.

(Greinin birtist í Morgunblaðinu í dag, 5. jan. 2007)

Athugasemdir

[Sóley Tómasdóttir (IP-tala skráð) 5.1.2007 kl. 17:52]

Góður!

[Alma Lísa Jóhannsdóttir, 6.1.2007 kl. 18:08]

Er Samfylkingingunni órótt...  Skil ekki þessar endalausu tilgangslausu árásir á okkur... Skjálfti?

[Gunnar Þór Ásgeirsson, 7.1.2007 kl. 03:44]

Skil ekki af hverju maður getur ekki verið jafnréttissinni án þess að þurfa að gefa konum öll störf sem maður er hæfari í.  Er ekki að taka afstöðu til þess hvor er hæfari, bara benda fólki á að jafnrétti er ekki að jafnmargar konur og karlar eru í stjórnunarstöðum.  

Þetta snýst um að kyn ráði ekki hver fái starfið, en mér sýnist jafnréttisstefna feminista, sem og margra annarra vera farin að snúast um of að ráða í stöður þannig að jafn sé á milli kynjanna, óháð hæfileikum hvers og eins.