Í takt við stefnu VG

Sjónarmið iðnaðarráðherra um að færa beri Hafrannsóknastofnun út úr sjávarútvegsráðuneyti, er ekki nýtt af nálinni.  Vinstri græn hafa í hugmyndum sínum um eflingu umhverfisráðuneytis í umhverfis- og auðlindaráðuneyti, lagt þetta til.  Fleiri hafa í gegnum árin viðrað sömu sjónarmið.

Það er athyglisvert að iðnaðarráðherra skuli nú koma þessu viðhorfi á framfæri skömmu eftir að nokkuð ítarlega var rætt um málefni stjórnarráðsins á sumarþingi sem er nýlega lokið.  Ríkisstjórnin, sem iðnaðarráðherra situr jú í, lagði þar fram frumvarp um breytingu á stjórnarráðslögum.  Þar var hvergi vikið að þessari hugsun, en hún bar þó á góma í umræðum um málið.  Í umræðum um frumvarp stjórnarinnar sagði ég m.a.:

Þarna mætti t.d. taka auðlindanýtinguna almennt. Við gætum verið að tala um málefni sjávarútvegsins. Tökum t.d. Hafrannsóknastofnun sem oft hefur verið rætt um að ætti gjarnan heima undir umhverfisráðuneyti enda þótt stjórn fiskveiðanna, ákvörðun um það hvernig aflaheimildum er úthlutað o.s.frv. sé á hendi atvinnuvegaráðuneytis. Þannig eru orkumálin til að mynda. Mörg rök eru fyrir því að orkumálin séu að hluta til umhverfismál og að hluta til atvinnugreinin.

Þessi sjónarmið mín og okkar í VG ríma ágætlega við þau sem iðnaðarráðherra er að segja.  En þau rök sem ráðherrann notar eiga ekki bara við um Hafrannsóknastofnun.  Þau eiga í hæsta máta einnig við um orkumálin.  Því er fróðlegt að vita hvort iðnaðarráðherra sé sjálfum sér samkvæmur og tali næst fyrir því að orkurannsóknir og auðlindanýtingin í orkumálum fari yfir í umhverfisráðuneyti.  Verður fróðlegt að fylgjast með vinnu ríkisstjórnarinnar í þessu efni á næstunni.

Össur vill færa Hafró frá sjávarútvegsráðuneytinu

Athugasemdir

[Níels A. Ársælsson., 22.6.2007 kl. 11:47]

Sæll. Skoðaðu endilega málefni Fiskistofu og hvort ekki sé tímabært að vekja upp umræðu varðandi það að virkja Landhelgisgæsluna mun betur en gert hefur verið og sameina Fiskistofu inn í Landhelgisgæsluna.