Kjósum um Orkuveituna

Vinstri græn hafa opnað á það í tengslum við breytingu á rekstrarformi Orkuveitunnar, að íbúar sveitarfélaganna sem eiga Orkuveituna, kjósi um breytinguna ef niðurstaða meirihluta eigendanna verður að mæla með breytingu.  Þetta er mikilvægt innlegg í umræðuna um Orkuveituna, ekki síst um lýðræðislegar ákvarðanir og meðferð opinberra auðlinda.

Sannleikurinn er sá að spurningin um Orkuveitu Reykjavíkur snýst ekki bara um rekstrarform.  Hún snýst ekki síður um lýðræðislegt ferli og ákvarðanir og hún snýst um eignarhald á mikilvægum auðlindum.  Orkuveitan sér um rafmagn, heitt og kalt vatn og fráveitu á starfsvæði sínu.  Engum dylst að hér er um að ræða grundvallar samfélagsþjónustu sem ekki er hægt að líta á sem hverja aðra vöru á markaði.  Hlutafélagavæðing, og síðar einkavæðing sem hlýtur að fylgja í kjölfarið, mun þess vegna hafa í för með sér að auðlindir, eins og orkan í iðrum lands og kalda vatnið, verður afhent einkaaðilum.  Það verður miklu stærra samfélagsrán en þegar auðlindir sjávar voru gefnar.

Það er þýðingarmikið að svo afdráttarlausar ákvarðanir verði ekki teknar nema að undangenginni atkvæðagreiðslu meðal íbúa svo þeir geti sjálfir tekið af skarið um það, hvort þeir vilja einkavæða þessar mikilvægu auðlindir.  Með hlutafélagavæðingu verður eignarhaldi fyrirtækisins nefnilega skipt í hluta sem eðli máls samkvæmt ganga kaupum og sölum.  Það er ástæða þess að við Vinstri græn viljum halda starfsemi sem á að vera í samfélagslegri eign í samfélagslegu eignarformi.  Hlutafélagaformið er það ekki.

Vilja að borgarbúar fái að kjósa um hlutafélagavæðingu OR

Athugasemdir

[Fannar frá Rifi, 6.9.2007 kl. 17:35]

Ef við hefðum farið með allar ákvarðanir í Íbúakosningar eða annað eins álíkt þá hefði aldrei neitt gerst. Við væru ekki með Ráðhúsið eða hreinlega heiluhverfinn vegna þess að íbúarnir vilja ekki að fleyri flytji í nágrennið til þeirra.

Samfélagslegeign? Til þess að flokksgæðingar geti farið þar og komið fram með gæluverkefni sín. Svona eins lína.net með tilheyrandi kostnaði á samfélagið?.  

[Andrés.si, 6.9.2007 kl. 23:53]

Ég vil frekkar fá svar um hækkun ústvars með sölu á Orkuveitu og á móti hækkun af orkuni sjálf. Að minu mati getur það farið hátt í 5000 hæra útgjalð heimilana á mánuði. 

[G. Valdimar Valdemarsson, 7.9.2007 kl. 13:38]

Hversvegna vilja VG víkja sér undan því að taka ákvörðun um félagsform OR og skýla sér bak við íbúalýðræðið?   Menn eiga ekki að bjóða sig fram ef þeir eru ekki tilbúnir að standa og falla sínum ákvörðunum í almennum kosningum.   Ef taka á upp íbúakosningar í auknum mæli er mikilvægt að þeim sé skapaður viðeigandi rammi með löggjöf.  Allir vita að kratar í Hf eru uppteknir af því í dag að koma sér undan niðurstöðu um álversstækkun.   Áður en hægt er að viðhafa íbúakosningar í mikilvægum málum þarf að koma ýmsum málum á hreint t.d.  hvenær og hvernig svona kosning bindur kjörna fulltrúa, hver þátttakan þarf að vera, hvað þarf marga til að fara fram á svona kosningu  og hvað niðurstaðan bindur hendur meirihluta til langs tíma.  Þessi atriði verða að vera skýr áður en til svona kosninga kemur, annars koma menn sér undan því með einum eða öðrum hætti að fara að niðurstöðunni.

[Fannar frá Rifi, 7.9.2007 kl. 14:25]

Og hvenær í skipulags planinu á að vera svona kosning. En ef af því verður að auknar íbúakosningar verða þá getum við svo sannarleg skorið niður í fjölda borgarfulltrúa. Í raun þarf bara borgarstjórann og kannski einn eða tvo fulltrúa auk hans. Þurfum ekkert að vera borga fyrir fleyri en það ef borgarstjórn á ekki að taka neinar ákvarðanir. 

[Árni Þór Sigurðsson, 7.9.2007 kl. 22:52]

Það er mikill misskilningur að halda að borgarstjórn sé óþörf þótt einstaka mikilvægar ákvarðanir séu bornar undir borgarbúa í almennum kosningum.  Staðreyndin er sú að borgarstjórn afgreiðir líklega um 5000 mál á hverju ári í nefndum og ráðum auk borgarráðs og borgarstjórnar svo menn þurfa ekki að hafa áhyggjur af verkleysi borgarfulltrúa þótt kosið væri um eitt og eitt mál, t.d. einu sinni á kjörtímabili.  Nóg að gera fyrir kjörna fulltrúa sem sagt.

[Rúnar Sveinbjörnsson, 8.9.2007 kl. 22:13]

Spurning til Valda. Hvað ef núverandi borgarstjóri gengur um allt fyrirtæki OR og margítrekar að OR verði ekki ekki selt. Ég spurði hann  svo margir heyrðu "og OR ekki HF-að", svarið var stuttaraleg "nei, nei óbreyttur rekstur" Út á þetta fékk Vilhjálmur fjölda atkvæð hjá starfsmönnum OR. Valdi eiga pólitíkusar að komast upp með að segja eitt en gera annað. Að vísu veit ég að það stendur ekki í ykkur framsóknarmönnum. 

Er ekki eðlileg að kjósa um slíkar stefnubreytingar í almennum kosningum?