Laisser-faire stefnan áfram við lýði

Afskiptaleysisstefna Sjálfstæðisflokksins kemur engum á óvart, en að Samfylkingin skuli sýna slíkt ábyrgðarleysi veldur vonbrigðum. Ef ekki er þörf á ráðstöfunum við þær aðstæður sem nú eru má spyrja hvort það sé þá nokkurn tímann? Ríkisstjórnin ætlar að láta reka á reiðanum, láta heimilin og fjölskyldurnar bera þungar byrðar vegna geysihárra vaxta og verðbólgu sem fallandi gengi mun svo enn kynda undir. Og við sjónarrönd glittir í að forsendur nýgerðra kjarasamninga bresti. Við þær aðstæður telur forsætisráðherra og áhöfn hans réttast að gera ekki neitt. Ríkisstjórnin veldur ekki hlutverki sýnu, hún er ekki vandanum vaxin og ætti því að koma sér sem fyrst úr brúnni á þjóðarskútunni. Því fyrr því betra.

Engar aðgerðir fyrirhugaðar vegna gengisfalls krónu

Athugasemdir

[Auðun Gíslason, 19.3.2008 kl. 16:52]

Hvað gera ráðþrota menn?  Ekkert!  Þeir ættu kannski að fá áfallahjálp?  En er þetta ekki í fullu samræmi við frjálshyggju djélistans og hægri-kratanna?

[Guðjón Sigþór Jensson, 20.3.2008 kl. 13:20]

Lögreglan varar alvarlega við stútum við stýrið. Nú eru strútar við stýri þjóðarskútunnar. Þegar skútan ruggar, skjótast landsfeðurninr í land og stinga höfðinu í sandinn eins og strútarnir eru sagðir gera þegar þeir verða huglausir.

Hvað á að nefna svona hugleysingja? Þeir virðast rökþrota, ráðvilltir og ráðlausir, þó þeir séu að þykjast að stýra landi og þjóð.

Mosi