Og hvað segir heilög Jóhanna?

Hún var ekki smá launahækkunin sem bankaráð Seðlabankans ákvað að skaffa bankastjórunum.  Litlar 200 þúsund krónur á mánuði!  Fulltrúar allra flokka samþykktu hækkunina, nema fulltrúi Vinstri grænna, Ragnar Arnalds.

Ekki veit ég í hvaða veröld þeir lifa sem ráða þessum málum.  Þeir virðast vera gersamlega úr öllum tengslum við raunveruleikann í íslensku samfélagi.  Á undanförnum árum hefur Jóhanna Sigurðardóttir verið ötull talsmaður lágtekjufólks í landinu og gagnrýnt harkalega sukk og ósvinnu í fjármálageiranum.  Nú er Jóhanna enn á ný orðin ráðherra vinnumarkaðsmála, launa- og kjaramála.  Hvernig bregst hún við þessum tíðindum?

Telur heilög Jóhanna ekki tilefni til að gera athugasemdir við þessa ákvörðun?

Samþykkt að hækka laun seðlabankastjóra um 200.000 kr. á mánuði

Athugasemdir

[Eiður Svanberg Guðnason, 6.6.2007 kl. 20:23]

Það er  ekki bara ómálefnalegt, heldur bæði hallærislegt og ósmekklegt að uppnefna fólk í pólitískri umræðu.

[Þorsteinn Egilson, 6.6.2007 kl. 21:15]

Sæll félagi. Þessar taktlausu hækkanir til toppanna í ríkisgeiranum eru orðnar svo alvanalegar að það er ekki nokkur maður sem tekur eftir þessu lengur. Svo þarftu nú vart að örvænta sjálfur, það hýtur að koma hækkun á Þingið líka.

-Veruleikafirringin virðist engum takmörkunum háð!!!!

[365, 6.6.2007 kl. 21:20]

Já, það verður fróðlegt að sjá hver launahækkunin verður á Alþingi og hverjir setja sig á móti henni.

[Magnús Þór Hafsteinsson, 6.6.2007 kl. 22:41]

Hver eru heildarlaun þín Árni, sem borgarfulltrúi og svo framvegis og síðan sem þingmaður? Datt svona í hug að spyrja tilefnisins vegna. Mbk,

[Gísli Baldvinsson (IP-tala skráð) 7.6.2007 kl. 15:20]

Ef þessi hækkun á eftir að verða forsenda fyrir kjaradóm þá er fjandinn laus. Í haust hefst samningur við 65% launþega en kjarasamningaskriðan er að fara af stað og nær hámarki vorið 2008. Hvað gera grunnskólakennarar þá?

[365, 8.6.2007 kl. 10:06]

Það á greinilega ekkert að svara, heldur þegja allt í hel, eða hvað?

[365, 8.6.2007 kl. 10:06]

Við bíðum eftir svörum.

[Árni Þór Sigurðsson, 9.6.2007 kl. 10:55]

Sæll 365.

Ég hef haft það sem reglu að svara ekki nafnlausum athugasemdum.  Vil gjarnan vita við hvern ég er að tala.