Batnandi fólki er best að lifa.... - eða þannig sko!

Nú nokkrum vikum eftir að ég lagði fram tillögu um þetta efni á Alþingi, með stuðningi þingmanna úr öllum flokkum, taka borgarfulltrúar Sjálfstæðisflokksins við sér og leggja hið sama til í borgarstjórn.  Reyndar lögðu minnihlutaflokkarnir í borgarstjórn líka fram sambærilega tillögu í kjölfar þingsályktunartillögu minnar og var henni vísað til umsagnar umhverfis- og samgönguráðs Reykjavíkur.  Virðist sem tillaga Sjálfstæðismanna nú sé úrvinnsla á tillögu minnihlutans.

Svo gerist það að borgarstjórinn í Reykjavík, Ólafur F. Magnússon, lætur fresta afgreiðslu tillögu meirihlutans, rétt eins og hann sé ekki hluti hans eða að hann hafi ekki verið hafður með í ráðum.  Er því jafnvel haldið fram að borgarstjórinn telji ekki að einhvers konar lestarsamgöngur séu hagkvæmur kostur í samgöngumálum Reykvíkinga.  Hvað er nú orðið af umhverfissinnanum Ólafi F. Magnússyni sem gekk úr Sjálfstæðisflokknum vegna óánægju með áherslur flokksins í umhverfismálum?  Engu er líkara en endaskipti hafi verið höfð í þessum ranni.  Ólafur afhjúpar sig sem helsta talsmann meiri og hraðari bílaumferðar og þar með mengunar og lakari lífsgæða í borginni.  Hann er því miður alveg kominn út af sporinu.

Vilja skoða lestakerfi í borginni

Athugasemdir

[Sturla Snorrason, 14.3.2008 kl. 21:58]

Árni Þór,  ætlar Ólafur ekki bara að byggja nýjan miðbæ við Geirsnef og stytta þannig flestar leiðir borgarbúa? Að mínu viti er engin önnur leið sem stenst umhverfismat.

[Guðjón Sigþór Jensson, 14.3.2008 kl. 22:30]

Ástæða er til að ætla, að vinstri mönnum lítist illa á að vaða í öllum þeim hundaskít sem nú er samansafnaður á Geirsnefi. Því hafi þeim fremur dottið í hug jarðgöng fram hjá þeeim ósköpum!

Mosi 

[Kjartan Pétur Sigurðsson, 15.3.2008 kl. 07:33]

Það er vel að það er samstíga áhugi allra flokka um bættar samgöngur hér á landi og þá sér í lagi fyrir suðvestur horn landsins. Ekki veit ég hvað kom skyndilega upp á hjá Ólafi F. Magnússyni núna á 11 stundu nema þá að mig grunar að þær fréttir sem dunið hafa á fjölmiðlum síðustu 2 dagana séu að undirlægi Sjálfstæðismanna sem hafa þá líklega alveg gleymt að láta umræddan Ólaf vita.

Lesa má áhugaverða umræðu hér um málið:

http://photo.blog.is/blog/photo/entry/474061/

Svo er annað, gæti verið að ákveðin stór flokkur sé klofin í afstöðu sinni til málsins, en Mbl þegir þunnu hljóði um málið - hvernig sem á því stendur.